ಕೋಟ ಶ್ರೀನಿವಾಸರ ಶ್ರೀಮಂತಿಕೆ ಬಗ್ಗೆ ಟೀಕೆ ಸಲ್ಲ

ಅವರ ಪಾಲಿಗೆ ಬಂದಿರುವುದು ಬರೇ ಹದಿನೆಂಟು ಕುರಿಗಳು ಮತ್ತು ಒಂದೂವರೆ ಎಕ್ರೆ ಭೂಮಿ.
ಇವತ್ತು ಅವರ ,ಮತ್ತವರ ಮಕ್ಕಳ ,ಮತ್ತವರ ಸೊಸೆಯರ ,ಮತ್ತವರ ಮೊಮ್ಮಕ್ಕಳ , ಮತ್ತವರ ಬೇನಾಮಿ ಹಣ ಬಂಗಾರ ಬೆಳ್ಳಿ ,ಇಡೀ ಕರ್ನಾಟಕದ ರಾಜಧಾನಿ ಮತ್ತು ಪಕ್ಕದ ಜಿಲ್ಲೆಗಳು,ಎಸ್ಟೇಟ್ ವಲಯಗಳ ಆಸ್ತಿ ಎಷ್ಟು ಇದೆ ಎನ್ನುವುದು ಆ ಸೂರ್ಯ ಮತ್ತು ಈ ಭೂಮಿಗೂ ಗೊತ್ತಿದೆ.
ಕೂಲಿ ಪಾಲಿ ಮಾಡಿ ದಿನಗಳೆಯುತ್ತಿದ್ದವರ ಮಗ ಕೋಟ ಶ್ರೀನಿವಾಸ ಪೂಜಾರಿಯವರ ಆಸ್ತಿ ಒಡವೆ ಮನೆ ಕುರಿತಾಗಿ ದಿನಾಲು ಮೌಲ್ಯ ಮಾಪನ ಮಾಡುತ್ತ ಜಾಲತಾಣದಲ್ಲಿ ಪ್ರಕಟಿಸುವುದು ಹಿತವೆನಿಸುವುದಿಲ್ಲ.
ರಾಜಕಾರಣಿಯಾದವನು ನಾಲ್ಕು ಕಾಸು ಸಂಪಾದಿಸದಿದ್ದರೆ ಮತ್ತೆ ಅವನಿಗೆ ಹೊಟೇಲು ಬಳಿಯೂ ಕರೆದು ಚಹ ಕುಡಿಸುವವರಿಲ್ಲ. ಮತ್ತೆ ನೀನೆಂತದು ಮಣ್ಣು ಹೊರುವುದಕ್ಕೆ ಮಂತ್ರಿ ಶಾಸಕನಾಗಿದ್ದಾ ಎಂದೂ ಕುಟುಕುತ್ತಾರೆ ,ಕುಟುಂಬದವರು ಸಮೇತ!

ಕೋಟ ಅವರದ್ದು ಕೈ ಗಿಡ್ಡ,ಯಾರಿಗೂ ಕಾಸು ಕೊಡುವವರಲ್ಲ,ಸಾರ್ವಜನಿಕ ಕಾಮಗಾರಿನೂ ಅಷ್ಟಕ್ಕಷ್ಟೇ ಅಂತೆಲ್ಲ ಜನಾರೋಪವಿದೆ. ನಾವು ನಮ್ಮ ಕೆಲವು ಮೀಡಿಯಾಗಳು ಹಣಕ್ಕಾಗಿ ಕೈ ಚಾಚುತ್ತ ಪ್ರಧಾನಿ ಲಾಲ್ ಬಹಾದ್ದೂರ ಶಾಸ್ತ್ರಿಯವರನ್ನೂ ಪರಮ ಭ್ರಷ್ಟಾಚಾರಿ ಎಂದು ಹೇಳುವುದಕ್ಕೂ ತಯಾರಾಗಿದ್ದವರು.

ಸದನದೊಳಗೆ ಮತ್ತು ಸಾರ್ವಜನಿಕ ವೇದಿಕೆಯಲ್ಲಿ ಕೋಟ ಶ್ರೀನಿವಾಸ ಪೂಜಾರಿಗೆ ಹೇಗೆ ಮಾತಾಡುವುದಕ್ಕೂ ಸ್ವಾತಂತ್ರ್ಯವಿದೆ,ಅವರ ಮಾತಿಗೆ ಸಂವಿಧಾನದ ಟೈಮಿಂಗ್ಸ್ ಕೂಡಾ ಇದೆ.ಹಾಗಾಗಿ ನಿರರ್ಗಳವಾಗಿ ಮಾತಾಡುತ್ತಾರೆ,ರಾಜಕೀಯವಾಗಿ ಬೈಯುತ್ತಾರೆ, ಸದನದಲ್ಲಿ ಮೋದಿ ,ಮೋದಿಯವರ ಘನತೆ ಎನ್ನುವುದೇ ಮಾತಾಗಿರುತ್ತದೆ.

ಕೋಟ ಶ್ರೀನಿವಾಸ ಪೂಜಾರಿ ಸೋಲಬೇಕು ಎಂದು ಮತದಾರ ಬಯಸುವುದಿಲ್ಲ ಆದರೆ ಅವರ ಕ್ಷೇತ್ರದ ಯಾವನೇ ಬಿಜೆಪಿ ಶಾಸಕ ಮಾಜಿ ಶಾಸಕನು ಕೂಡಾ ಪೂಜಾರಿ ಗೆದ್ದು ಬರಲಿ ಎಂದು ಪ್ರಾರ್ಥನೆ ಮತ್ತು ಆತ್ಮಸಾಕ್ಷಿಯ ಕೆಲಸ ಮಾಡುವುದಿಲ್ಲ,ಸಾಧ್ಯವಿಲ್ಲ ಕೂಡ! ಯಾಕೆಂದರೆ ಪೂಜಾರಿ ಬರೇ ಪರಿಷತ್ ಸದಸ್ಯನಾಗಿದ್ದುಕೊಂಡೇ ನಮ್ಮೆಲ್ಲರ ಹೆಡೆಯ ಮೆಟ್ಟಿ ಕುಣಿದಾಡಿದವನು.ಇನ್ನು,ಸಂಸತ್ತಿಗೆ ಪ್ರವೇಶಿಸಿದರೆ ಮತ್ತೆ ನಾವು ಸರಕಾರಿ ಬಸ್ಸಿನ ಚಾಲಕನಷ್ಟು ಮರ್ಯಾದೆಗೂ ಯೋಗ್ಯರಲ್ಲದವರಾಗುವುದು ನಿಘಂಟು ಎನ್ನುವುದೇ ಇವರೆಲ್ಲರ ತಲೆಬಿಸಿ.

ಅದೆಲ್ಲ ಚರ್ವಿತ ಚರ್ವಣ ಪುರಾಣ ಬೇಡ.ಆದರೆ ಕೋಟ ಶ್ರೀನಿವಾಸ ಪೂಜಾರಿಯವರನ್ನು ಜನ ಸೋಲಿಸಲಿಕ್ಕೆ ಅನಕೂಲವಾಗುವದಕ್ಕಾಗಿ ಅವರ ಆಸ್ತಿ ಮೌಲ್ಯಮಾಪನವನ್ನು ವಿರೋಧ ಪಕ್ಷದ ಬೆಂಬಲಿಗ ಮಂದಿಗಳು ಹಾಗೆ ಲೇವಡಿ ಮಾಡುವುದು ನನಗಂತೂ ಬೇಸರ.ನೀವೇನು ಬಯಕೆ ಇಟ್ಟುಕೊಂಡಿರುವಿರೊ ಅದನ್ನು ಮೇಲೆ ಹೇಳಿದವರೇ ಮಾಡುತ್ತಿದ್ದಾರೆ,ಸಾಕಲ್ಲವೇ?
ಪೂಜಾರಿಯವರಿಗೆ ನನ್ನ ಶುಭ ಹಾರೈಕೆಗಳು.

. –ವಿ.ಕೆ.ವಾಲ್ಪಾಡಿ