94 ಸಿ ಅರ್ಜಿಯನ್ನು ಏಕಾಏಕಿ ತಿರಸ್ಕರಿಸಬಾರದು : ಶಾಸಕ ಸುನಿಲ್ ಕುಮಾರ್ ಖಡಕ್ ಸಲಹೆ

94 ಸಿ ಅರ್ಜಿಯನ್ನು ಏಕಾಏಕಿ ತಿರಸ್ಕರಿಸಬಾರದು : ಶಾಸಕ ಸುನಿಲ್ ಕುಮಾರ್ ಖಡಕ್ ಸಲಹೆ

ಕಾರ್ಕಳ ಮತ್ತು ಹೆಬ್ರಿ ತಾಲೂಕಿನಲ್ಲಿ 94ಸಿ ಅರ್ಜಿಯನ್ನು ಒಟ್ಟು ವಿಲೇವಾರಿ ಮಾಡಿ ಮುಗಿಸುವ ಉದ್ದೇಶವಿಟ್ಚುಕೊಂಡು ಯಾವುದೇ ಅರ್ಜಿಯನ್ನು ಕೂಡ ವಜಾ ಮಾಡದೆ ಎಲ್ಲವನ್ನೂ ಪುರಸ್ಕರಿಸಬೇಕೆಂದು ಶಾಸಕ ಸುಮಿಲ್ ಕುಮಾರ್ ಅವರು ತಾಲೂಕಿನ ಅಧಿಕಾರಿಗಳಿಗೆ ಖಡಕ್ ಸಲಹೆ ನೀಡಿದ್ದಾರೆ.

ಕಾರ್ಕಳ ತಾಲೂಕು ಪಂಚಾಯತ್ ಸಭಾಂಗಣದಲ್ಲಿ ಕಾರ್ಕಳ ಹಾಗೂ ಹೆಬ್ರಿ ತಾಲೂಕು ಮಟ್ಟದ ಇಲಾಖಾ ಅಧಿಕಾರಿಗಳ ಸಭೆ ನಡೆಸಿ, ಕಾರ್ಕಳ ಕ್ಷೇತ್ರದಲ್ಲಿ ನಡೆಯುತ್ತಿರುವ ಅಭಿವೃದ್ಧಿ ಕಾರ್ಯಕ್ರಮಗಳ ಸ್ಥಿತಿಗತಿಗಳನ್ನು ಪರಿಶೀಲಿಸಿದ ಸಂದರ್ಭದಲ್ಲಿ ಮಾತನ್ನಾಡಿದ ಶಾಸಕ ಸುನಿಲ್ ಕುಮಾರ್, ಅಕ್ರಮ ಸಕ್ರಮ ಮತ್ತು ಅರಣ್ಯ ಪಕ್ಕದಲ್ಲಿ ವಾಸಿಸುವವರು , ಮುಂತಾದವರು ನೀಡಿರುವ ವಿವಿಧ ನಮೂನೆಗಳ ಅರ್ಜಿಯನ್ನು ಯಾವುದೇ ಕಾರಣಕ್ಕೂ ತಿರಸ್ಕರಿಸಕೂಡುದು. ಕಂದಾಯ ಹಾಗೂ ಅರಣ್ಯ ಇಲಾಖೆಯವರ ಜಂಟಿ ಅಳತೆಯಾಗುವುದಕ್ಕೆ ಮುನ್ನವೇ ಅರ್ಜಿಯನ್ನು ತಿರಸ್ಕರಿಸಿದ್ದಲ್ಲಿ ಮುಂದೆ ಆ ಜಾಗವನ್ನು ಪುರಸ್ಕರಿಸಲು ಅರ್ಹವಾದರೂ ಅದಕ್ಕೆ ಪುನಃ ಅರ್ಜಿ ಕೊಡುವುದಕ್ಕೆ ಅವಕಾಶವೇ ಇರುವುದಿಲ್ಲ. ಹಾಗಿರುವಾಗ ಇಲಾಖೆಗಳ ಜಂಟಿ ತನಿಖೆಯಾಗುವವರೆಗೆ ಯಾರದೇ ಅರ್ಜಿಯನ್ನು ಯಾವುದೇ ಕಾರಣಕ್ಕೂ ವಜಾಮಾಡಕೂಡದು ಎಂದು ತಹಶೀಲ್ದಾರರುಗಳಿಬ್ಬರಿಗೂ ಸಲಹೆ ನೀಡಿದ್ದಾರೆ.

ವರ್ಷಕ್ಕೆ ಹತ್ತು ಸಾವಿರ ಜಾನುವಾರುಗಳು ಕಡಿಮೆಯಾಗುತ್ತಿವೆ ಎಂದು ವಿವರ ನೀಡಿರುವುದನ್ನು ಶಾಸಕರು ಗಂಭೀರವಾಗಿ ಚರ್ಚೆಗೆ ಕೈಗೊಂಡರು. ಭದ್ರಾವತಿ ಕಡೆಯಿಂದ ರೈತರು ಆಗಮಿಸಿ ಹೆಚ್ಚಿನ ದರಕ್ಕೆ ದನಗಳನ್ನು ಖರೀದಿಸಿ ಕೊಂಡೊಯ್ಯುತ್ತಿರುವುದಾಗಿ ಅಧಿಕಾರಿಗಳು ಕಾರಣವನ್ನು ಸಭೆಯಲ್ಲಿ ತಿಳಿಸಿದರು.
ಎಪಿಎಲ್ ಹಾಗೂ ಬಿಪಿಎಲ್ ಕಾರ್ಡುಗಳ ಬದಲಾವಣೆ ಮತ್ತು ರದ್ಧತಿಯ ಕುರಿತಂತೆ ಬಹಳ ಎಚ್ಚರಿಕೆಯಿಂದ ಕೆಲಸ ಮಾಡಬೇಕಾಗಿದೆ. ಬಿಪಿಎಲ್ ಕಾರ್ಡನ್ನು ಸಾರಸಗಾಟಾಗಿ ರದ್ದುಪಡಿಸದೆ ಸರಿಯಾಗಿ ಪರಿಶೀಲನೆ ಮಾಡಬೇಕು. ಅದು ಬಹಳ ಸೂಕ್ಷ್ಮ ವಿಚಾರವಾಗಿರುವುದರಿಂದ ಅಧಿಕಾರಿಗಳು ದುಡುಕಿನ ನಿರ್ಧಾರ ಕೈಗೊಳ್ಳಬಾರದು. ಬಿಪಿಎಲ್ ಕಾರ್ಡುಗಳನ್ನು ರದ್ದುಪಡಿಸದೆ ಸಾಧ್ಯವಾದಷ್ಟು ಉಳಿಸುವ ಪ್ರಯತ್ನ ಮಾಡಬೇಕು ಎಂದರು. ಯಾವನೇ ಅಧಿಕಾರಿಯೂ ಕೂಡಾ ವೈಯಕ್ತಿಕ ಸೇಡು ಅಥವಾ ಇತರ ಪ್ರಭಾವಕ್ಕೊಳಗಾಗಿ ಬಿಪಿಎಲ್ ಕಾರ್ಡ್ ರದ್ದು ಮಾಡುವುದಕ್ಕೆ ಮುಂದಾಗದಂತೆ ಶಾಸಕರು ಸೂಚನೆ ಕೊಟ್ಟರು. ಮೂರು ಸಾವಿರ ಬಿಪಿಎಲ್ ಕಾರ್ಡುಗಳ ಪರಿಶೀಲನೆಗೆ ರಾಜ್ಯ ಸರಕಾರದಿಂದಲೇ ಪಟ್ಚಿ ಬಂದಿರುವುದಾಗಿ ಉಪತಹಶಿಲ್ದಾರರು ಸಭೆಗೆ ತಿಳಿಸಿದರು.

ಕಾರ್ಕಳದಲ್ಲಿ ಈ ವರ್ಷ ಆರು ಮಂದಿ ಕುಷ್ಠರೋಗಿಗಳ ಪತ್ತೆಯಾಗಿರುವ ಆಶ್ಚರ್ಯ ಹಾಗೂ ಆಘಾತಕರವಾದ ವಿಷಯಕ್ಕೆ ಸಂಬಂಧಿಸಿದಂತೆ , ವೈದ್ಯಕೀಯ ಇಲಾಖೆಯು ಅದನ್ನು ಗಂಭೀರವಾಗಿ ಪರಿಗಣಿಸಬೇಕು ಎಂದು ಶಾಸಕ ಸುನಿಲ್ ಕುಮಾರ್ ವೈದ್ಯಾಧಿಕಾರಿಯನ್ನು ಕೇಳಿಕೊಂಡರು.
ಕಾರ್ಕಳ ಸರಕಾರಿ ಆಸ್ಪತ್ರೆಯಲ್ಲಿ ಪರಿಪೂರ್ಣವಾದ ಸೇವಾ ಸೌಲಭ್ಯವಿದ್ದು ಯೋಗ್ಯ ರೀತಿಯ ಚಿಕಿತ್ಸೆ ನೀಡುತ್ತಿದೆ. ಹೆರಿಗೆ ತಜ್ಞವೈದ್ಯರುಗಳೂ ಇರುವುದರಿಂದ ಹೆರಿಗೆಯ ಸಂಖ್ಯೆ ಇಳಿಮುಖವಾಗದಂತೆ, ಸರಕಾರಿ ಆಸ್ಪತ್ರೆಗೆ ರೋಗಿಗಳ ಭೇಟಿ ಸಂಖ್ಯೆ ಕಡಿಮೆಯಾಗದಂತೆ ಆಸ್ಪತ್ರೆಯಲ್ಲಿನ ಸೇವಾ ಅನುಕೂಲತೆಗಳನ್ನು ಜನರಿಗೆ ಗೊತ್ತುಮಾಡಬೇಕು ಎಂದು ವೈದ್ಯಾಧಿಕಾರಿಗೆ ಸಲಹೆ ನೀಡಿದರು.
ಸೋಲಾರ್ ವಿದ್ಯುತ್ ಪ್ಲಾಂಟ್ ನಿರ್ಮಾಣಕ್ಕೆ ಸೂಕ್ತವಾದ ಜಾಗವನ್ನು ಕೊಡುವುದಕ್ಕೆ ಕಾರ್ಕಳ ಮತ್ತು ಹೆಬ್ರಿ ತಬಶಿಲ್ದಾರರಿಗೆ ಸೂಚನೆ ನೀಡಲಾಯಿತು.
ತಾಲೂಕಿನ ವಿವಿಧ ಇಲಾಖೆಯ ಅಧಿಕಾರಿಗಳು ಕ್ಷೇತ್ರ ಪರಿಶೀಲನೆಗೆ ಹೋಗದೆ ಕಚೇರಿಗೆ ಬಂದಿರುವ ಅರ್ಜಿಗಳನ್ನಷ್ಟೇ ಲೆಕ್ಕ ಹಾಕಿಕೊಂಡು ಯೋಜನೆಗಳ ಅಭಿವೃದ್ಧಿಯ ಅಂಕಿ ಅಂಶಗಳನ್ನು ಒಪ್ಪಿಸುವುದನ್ನು ನಿಲ್ಲಿಸಬೇಕು . ಇನ್ಮುಂದೆ ಕೇವಲ ಕಾಗದದಲ್ಲಿನ ಯೋಜನೆಯ ಅಂಕಿ ಅಂಶವನ್ನು ಸಭೆಯಲ್ಲಿ ಉಗುಳಕೂಡದು ಎಂದೂ ಮುನ್ನೆಚ್ಚರಿಕೆ ನೀಡಿದರು.
ಇಲಾಖೆಗಳು ಪರಸ್ಪರ ಹೊಂದಾಣಿಕೆಯಿಂದ ಜಂಟಿಯಾಗಿ ಕೆಲಸವನ್ನು ಮಾಡದೆ,ಹಂಚಿಕೊಳ್ಳದೆ ತಮ್ಮಿಷ್ಟ ಬಂದಂತೆ ಒಂಟಿಯಾಗಿ ಕೆಲಸ ಮಾಡುವುದರಿಂದ ಸರಕಾರದ ಯಾವುದೇ ಸವಲತ್ತು ಕೂಡ ಜನರಿಗೆ ಸರಿಯಾಗಿ ತಲುಪುತ್ತಿಲ್ಲವಾದುದಕ್ಕೆ ಮುಖ್ಯ ಕಾರಣವಾಗಿದೆ. ಕಂದಾಯ ಮತ್ತು ಅರಣ್ಯ ; ಆರೋಗ್ಯ ಮತ್ತು ಮಹಿಳಾ ,ಮಕ್ಕಳ ಕಲ್ಯಾಣ ಇಲಾಖೆ ; ತೋಟಗಾರಿಕೆ ಮತ್ತು ಕೃಷಿ ಇಲಾಖೆ ಹೀಗೆ ಎಲ್ಲ ಇಲಾಖೆಗಳ ಅಧಿಕಾರಿಗಳು ಪರಸ್ಪರ ವಿಚಾರ ವಿನಿಮಯವಾಗಲಿ, ಕ್ಷೇತ್ರಗಳಿಗೆ ಖುದ್ದು ಭೇಟಿ ನೀಡುವುದನ್ನಾಗಲಿ ಮಾಡದೆಯೆ ಜನರು ಸರಕಾರದ ಸವಲತ್ತಿನ ಬಗ್ಗೆ ಅಥವಾ ಸುತ್ತೋಲೆ ಬಗ್ಗೆ ಏನೂ ಅರಿವಿಲ್ಲದಂತಾಗಿ ವಂಚಿತರಾಗುವರು ಎಂದ ಶಾಸಕ ಸುನಿಲ್ ಕುಮಾರ್, ಸರಕಾರದ ಸವಲತ್ತನ್ನು ಜನರಿಗೆ ಸರಿಯಾಗಿ ಒದಗಿಸುವಲ್ಲಿ ಅಧಿಕಾರಿಗಳು ಬೇಜವಾಬ್ದಾರಿ ತೋರಿಸುವುದು ಸಲ್ಲದು ಎಂದರು. ನೀರು,ಬೆಳಕು,ದಾರಿ ಈ ಮೂರು ವಿಷಯಗಳಿಗೆ ಸಂಬಂಧಪಟ್ಟಂತೆ ಅಧಿಕಾರಿಗಳು ಜನಸ್ನೇಹಿಯಾಗಿ ಕರ್ತವ್ಯ ನಿರ್ವಹಿಸಬೇಕು , ಜನರಿಗೆ ಒದಗುವಲ್ಲಿ ಮುತುವರ್ಜಿ ವಹಿಸಬೇಕು ಎಂದು ಸಲಹೆ ನೀಡಿದರು.

ಇದೇ ಸಂದರ್ಭದಲ್ಲಿ ಆಯ್ದ ಅಂಗನವಾಡಿ ಕೇಂದ್ರಗಳಿಗೆ ಸ್ಮಾರ್ಟ್ ಟಿವಿಗಳನ್ನು ವಿತರಿಸಲಾಯಿತು.

-ವಿ. ಕೆ. ವಾಲ್ಪಾಡಿ