ಮರಳಿ ಬಾ….ಅರ್ಜುನ ….ಕೇರಳಕ್ಕೆ ಕೇರಳವೇ ಅತ್ತೂಗರೆದು ಪ್ರಾರ್ಥಿಸುತ್ತಿದೆ…!!

ಮರಳಿ ಬಾ….ಅರ್ಜುನ ….ಕೇರಳಕ್ಕೆ ಕೇರಳವೇ ಅತ್ತೂಗರೆದು ಪ್ರಾರ್ಥಿಸುತ್ತಿದೆ..!!

ಉತ್ತರಕನ್ನಡದ ಶಿರೂರಿನ ಭೂಕುಸಿತದಲ್ಲಿ ಲಾರಿ ಸಹಿತ ಚಾಲಕ ಅರ್ಜುನ್ ಪರ್ವತಸದೃಶ ಮಣ್ಣ ರಾಶಿಯೊಳಗೆ ಕಾಣೆಯಾಗಿ ಭರ್ತಿ 7ದಿನಗಳೇ ಸಾಗಿದೆ…
ಇನ್ನೂ ಲಾರಿಯನ್ನಾಗಲೀ, ಅರ್ಜುನನ್ನಾಗಲೀ ಪತ್ತೆ ಹಚ್ಚಲು ಸಾಧ್ಯವೇ ಆಗಿಲ್ಲ!
ಆದರೆ ನಿರೀಕ್ಷೆಯೆಂಬ ಭರವಸೆಯನ್ನು ಕೈಬಿಡದೆ ಇಡೀ ಕೇರಳಕ್ಕೆ ಕೇರಳವೇ ಅರ್ಜುನನಿಗಾಗಿ ಮಮ್ಮಲ ಮರುಗಿ ಪ್ರಾರ್ಥಿಸುತ್ತಿದೆ..ಕಾಯುತ್ತಿದೆ!!
ಇದರಲ್ಲಿ ಜಾತಿ,ಮತ,ಪಂಗಡ ಬೇಧಗಳ ರಾಜಕೀಯವೇ ಇಲ್ಲ!
ಮಲಯಾಳಂ ಮಾಧ್ಯಮಗಳಂತೂ ತಂಡೋಪತಂಡವಾಗಿ ಶಿರೂರಿನಲ್ಲಿ ರಾತ್ರಿಹಗಲೆನ್ನದೇ ಬೀಡುಬಿಟ್ಟು ಕ್ಷಣಕ್ಷಣಗಳ ಅಪ್ಟೇಡ್ ನೀಡುತ್ತಿವೆ.
ಥೇಟ್ ಯುದ್ಧಭೂಮಿಯ ವರದಿಯಂತೆ!!!
ರಾಡಾರ್ ಬಳಸಿ ಕೇಂದ್ರ ಸೇನೆಯೇ ರಂಗಕ್ಕಿಳಿದು ರಕ್ಷಣಾಶೋಧ ನಡೆಸುತ್ತಿವೆ..ಕೇರಳದಿಂದಲೂ ತಂಡೋಪತಂಡವಾಗಿ ಜನಸಾಗರವೇ ಸಹಾಯ ಹಸ್ತ ಚಾಚಿ ಶಿರೂರಿಗೆ ತೆರಳಿದೆ….

ಈ ವಿದ್ಯಾಮಾನಗಳನ್ನೆಲ್ಲ ಕಂಡು ಕರ್ನಾಟಕ ಜನತೆ, ಅಧಿಕಾರಿಗಳೇ ದಂಗಾಗಿದ್ದಾರೆ.
ಕೇರಳ ತೋರುವ ಕಾಳಜಿ, ಮಾನ್ಯತೆ ಮತ್ತು ವಿಷಯದ ಗಂಭೀರತೆ , ಪರಿಗಣಿಸಿ ಕನ್ನಡಿಗರೇ ಬೆಕ್ಕಸಬೆರಗಾಗಿದ್ದಾರೆ…!

ಇಷ್ಟಕ್ಕೂ….
ಮಣ್ಣಿನಡಿ ಸಿಲುಕಿರೋದು ಯಾರು..?
ಪ್ರಭಾವಿ ರಾಜಕಾರಣಿಯೇ..? ಮುತ್ಸದ್ದಿಯೇ?
ವಿಐಪಿಯೇ…??- ಇದು ಪೊಲೀಸರೇ ಕೇಳಿದ ಮೊದಲ ಪ್ರಶ್ನೆ..!!
ಹೌದು..
ಕೇರಳದಲ್ಲಿ ಗುಡಿಸಲಿನಲ್ಲಿ ವಾಸಿಸುವ ಕಟ್ಟಕಡೆಯ ದರಿದ್ರನೂ ಸಂಕಷ್ಟ ದ ಸಮಯದಲ್ಲಿ ಇಡಿ ರಾಜ್ಯಕ್ಕೆ ವಿಐಪಿಯಾಗಿ ಬದಲಾಗುತ್ತಾನೆ..!
ಮನುಷ್ಯನೆಂಬ ಪರಿಗಣನೆ ಸಿಗುತ್ತದೆ. ಇದರಲ್ಲಿ ಜಾತಿ,ಮತ ಬೇಧಗಳ ರಾಜಕೀಯವೇ ಇಲ್ಲ..!
ಇಂಥ,ಮನೋಸ್ಥಿತಿಯನ್ನು ಇಲ್ಲಿ ಮಾಧ್ಯಮಗಳು, ರಾಜಕೀಯ ರೂಪಿಸಿದೆ ಎಂದರೆ ಉತ್ಪ್ರೇಕ್ಷೆಯಲ್ಲ!

ಇಂಥ ಮಾನುಷಿಕ ಪರಿಗಣನೆ ಕರ್ನಾಟಕದಲ್ಲಿ ಕಾಣೆಯಾದ ಕಾರಣವೇ ಶಿರೂರಿನ ಬೆಳವಣಿಗೆ ಪೋಲೀಸರಲ್ಲೇ ಅಚ್ಚರಿ ಹುಟ್ಟಿಸಿತು!
ಜತೆಗೆ ಕರ್ನಾಟಕಕ್ಕೆ ಕಳಂಕ ತರುವಂಥ ವರದಿಗಳೂ ಬಿತ್ತರವಾಯಿತು.!
ಶಿರೂರಿನಲ್ಲಿ ಗುಡ್ಡೆಯೇ ಯಮಸದೃಶವಾಗಿ ಕುಸಿದು ಎಷ್ಟು ಜೀವ ಬಲಿತೆಗೆಯಿತೋ…??
ಇನ್ನೂ ನಿಖರ ಲೆಕ್ಕವಿಲ್ಲ.
ಅದರಲ್ಲಿದ್ದವರು ಯಾವ್ಯಾವ ರಾಜ್ಯದವರೋ ಗೊತ್ತಿಲ್ಲ. ಆದರೆ ಎಲ್ಲರೂ ಜೀವ ಸದೃಶ ಮನುಷ್ಯರು ತಾನೇ??
ಅವರಿಗೂ ಮನೆ, ಮಡದಿ, ಕುಟುಂಬ ಸಂಸಾರಗಳಿವೆ ತಾನೇ??
ಅವರೂ ನಮ್ಮವರೇ ತಾನೇ..??

ಈ ಕಾಳಜಿಯಿಂದಲೇ ಕೇರಳ ಶಿರೂರಿನಲ್ಲಿ ಅರ್ಜುನನ್ನು ಮತ್ತು ಆತನ ಲಾರಿಯನ್ನು ಸಮರೋಪಾದಿಯಲ್ಲಿ ಶತಪ್ರಯತ್ನಗಳಿಂದ ಹುಡುಕುತ್ತಿದೆ. ಕಲ್ಲಿಕೋಟೆಯಲ್ಲಿರುವ ಚಾಲಕ ಅರ್ಜುನನ ಮನೆಗೆ ಪ್ರಮುಖ ನಾಯಕರೆಲ್ಲರೂ ತೆರಳಿ ಆ ಕುಟುಂಬಕ್ಕೆ ಧೈರ್ಯ ನೀಡಿ ಸಂತೈಸುತ್ತಿವೆ.
ಜಗತ್ತಿನ ಎಲ್ಲೇ ಕೇರಳೀಯರಿಗೆ ಈರೀತಿಯಲ್ಲಿ ಏನೇ ತೊಂದರೆಗಳಾದರೂ ಸರಕಾರ, ಮಾಧ್ಯಮ, ನಾಡಜನತೆ ಒಂದಾಗಿ ಸಕಾಲಿಕವಾಗಿ ಸ್ಪಂದಿಸುತ್ತಾರೆ.
ಇದರಲ್ಲಿ ಅಚ್ಚರಿಯೇನಿಲ್ಲ..
ಇದು ಮಾನುಷಿಕ ಪರಿಗಣನೆಯ ಧರ್ಮ..

ಆದರೆ ಇಂಥ ನಡತೆ ಅನ್ಯ ರಾಜ್ಯಗಳಲ್ಲಿ ಅಪರೂಪ.
ಸಿನಿಮಾ ನಟನಟಿಯರು ಸತ್ತಾಗಲೋ, ರಾಜಕೀಯ ಧುರೀಣ, ಸೆಲೆಬ್ರಿಟಿಗಳು ಇನ್ನಿಲ್ಲವಾದರಷ್ಟೇ ಗಂಟೆಗಟ್ಟಲೆ ಕೊರೆಯುವ ದೃಶ್ಯಮಾಧ್ಯಮಗಳು ಕೇರಳದ ಮಾಧ್ಯಮಗಳನ್ನು, ಅದರ ಸುದ್ದಿಸಂಸ್ಕಾರವನ್ನು ಕಂಡು ಕಲಿಯಬೇಕಾದುದು ಸಾಕಷ್ಟಿದೆ.
ಒಂದು ನಾಡಿನ ಜನತೆಯಲ್ಲಿ ಅಭಿರುಚಿ, ಭಾಷೆ, ಸಂಸ್ಕಾರ, ನೈತಿಕತೆ, ವ್ಯಕ್ತಿತ್ವ ರೂಪಿಸುವಲ್ಲಿ ಮಾಧ್ಯಮಗಳ ಪಾತ್ರ ನಿರ್ಣಾಯಕ. ಆದ್ದರಿಂದಲೇ ಇದು ನಾವೇ ನಿರ್ಮಿಸಿಕೊಂಡ
ಮನೋಸ್ಥಿತಿಗಳ ವ್ಯತ್ಯಾಸ ಅಷ್ಟೇ…

ಕೇರಳ ಇನ್ನೂ ನಿರೀಕ್ಷೆ ಕೈಬಿಟ್ಟಿಲ್ಲ..?
ಒಂದುಸಿರಿನ ಪ್ರಾಣವಿದ್ದರೂ ಬದುಕಿಸುವುದಕ್ಕಾಗಿ ಒಂದಾಗಿದೆ, ಪರಿಶ್ರಮಿಸುತ್ತಿದೆ.
ಮರಳಿ ಬಾ ಅರ್ಜುನ ಎಂದೇ ಪ್ರಾರ್ಥಿಸುತ್ತದೆ…!
ಇದಲ್ಲವೇ ಮಾನವತೆ..!

                                                                            * ಎಂ. ನಾ. ಚಂಬಲ್ತಿಮಾರ್