ಆಗಸ್ಟ್‌ ೧೫ ಸ್ವಾತಂತ್ರ್ಯೋತ್ಸವದಂದು ಪುತ್ಥಳಿ ಲೋಕಾರ್ಪಣೆ : ಪಡುಕುಡೂರಿನಲ್ಲಿ ಸಂಭ್ರಮ
ಪಡುಕುಡೂರಿನ ಕೀರ್ತಿ ಜಗದಗಲ ಪಸರಿಸಿದ ಎಂ.ಡಿ.ಅಧಿಕಾರಿ ಪುತ್ಥಳಿ ಪ್ರತಿಷ್ಠಾಪನೆ
ವಿಶೇಷ ಲೇಖನ – – ಸುಕುಮಾರ್‌ ಮುನಿಯಾಲ್‌
ಪಡುಕುಡೂರು : ಸ್ವಾತಂತ್ರ್ಯ ಹೋರಾಟಗಾರರಾಗಿ ಪಡುಕುಡೂರಿನ ಕೀರ್ತಿಯನ್ನು ಜಗದಗಲ ಪಸರಿಸಿ ಜನಮನದಲ್ಲಿ ಶಾಶ್ವತವಾಗಿ ನೆಲೆಯಾದ ಪಡುಕುಡೂರು ಬೀಡು ಎಂ.ಡಿ.ಅಧಿಕಾರಿ ಅವರ ಪುತ್ಥಳಿಯನ್ನು ಪ್ರತಿಷ್ಠಾಪಿಸಲು ಚಿಂತನೆಯನ್ನು ಮಾಡಿ ಯೋಜನೆ ಯೋಜನೆ ಪರಿಕಲ್ಪನೆಯನ್ನು ಮಾಡಿದವರು ದೇಶಭಕ್ತರಾದ ಪಡಕುಪರ್ಕಳ ಶಂಕರ ಶೆಟ್ಟಿಯವರು. ಉದಾರತೆಯಿಂದ ಪಡುಕುಡೂರು ಪಟೇಲರ ಮನೆ ಜಗದೀಶ ಹೆಗ್ಡೆ ಅವರ ನೇತ್ರತ್ವದಲ್ಲಿ ಪುತ್ಥಳಿ ಪ್ರತಿಷ್ಠಾಪನಾ ಸಮಿತಿಯು ಕಳೆದ ೧ ವರ್ಷದಿಂದ ಹಲವು ಸಭೆ ಸೇರಿ ಕಾರ್ಯ ಮಾಡುತ್ತಿದೆ. ಸಮಿತಿಯ ಜೊತೆಗೆ ಹಲವು ಉಪ ಸಮಿತಿಗಳು, ಊರಿನವರು, ಜನಪ್ರತಿನಿಧಿಗಳು ಸೇರಿ ಹಲವರು ಮಹಾನ್‌ ಕಾರ್ಯದ ಜೊತೆಗಿದ್ದಾರೆ. ಆಗಸ್ಟ್‌ ೧೫ ರಂದು ಪಡುಕುಡೂರು ಶಾಲೆಯ ಬಳಿ ವಿಶೇಷ ಪೀಠದಲ್ಲಿ ನಮ್ಮೂರಿನ ಹೆಮ್ಮೆ ಸ್ವಾತಂತ್ರ್ಯ ಹೋರಾಟಗಾರ ಪಡುಕುಡೂರು ಬೀಡು ಎಂ.ಡಿ.ಅಧಿಕಾರಿ ಅವರ ಪುತ್ಥಳಿಯು ಪ್ರತಿಷ್ಠಾಪನೆಗೊಂಡು ಲೋಕಾರ್ಪಣೆಗೊಳ್ಳಲಿದೆ.
ಹಲವು ಕ್ಷೇತ್ರಗಳ ಸಾಧಕರ ಸನ್ಮಾನದ ಜೊತೆಗೆ ಪುತ್ಥಳಿಯ ಲೋಕಾರ್ಪಣೆಯ ಸಂಭ್ರಮ ಸಂಪನ್ನಗೊಳ್ಳಲಿದೆ. ಹೊಂಬುಜ ಜೈನ ಮಠದ ಜಗದ್ಗುರು ಡಾ. ದೇವೇಂದ್ರ ಕೀರ್ತಿ ಭಟ್ಟಾರಕ ಮಹಾಸ್ವಾಮೀಜಿ ಪಾವನ ಸಾನಿಧ್ಯ ವಹಿಸುವರು. ಮಾಜಿ ಮುಖ್ಯಮಂತ್ರಿ ಡಾ.ಎಂ.ವೀರಪ್ಪ ಮೊಯಿಲಿ ಪುತ್ಥಳಿ ಲೋಕಾರ್ಪಣೆ ಮಾಡುವರು. ಉಡುಪಿ ಜಿಲ್ಲಾ ಉಸ್ತುವಾರಿ ಸಚಿವೆ ಲಕ್ಷ್ಮೀ ಆರ್‌ ಹೆಬ್ಬಾಳ್ಕರ್‌ ಪುತ್ಥಳಿ ಲೋಕಾರ್ಪಣೆ ಸಂಭ್ರಮವನ್ನು ಉದ್ಘಾಟಿಸುವರು. ಎಂ.ಡಿ.ಅಧಿಕಾರಿ ಸುಪುತ್ರಿ ಅಭಯಲಕ್ಷಿ, ಕಾರ್ಕಳ ಶಾಸಕ ಸುನಿಲ್‌ ಕುಮಾರ್‌, ಗಣ್ಯರಾದ ಮುನಿಯಾಲು ಉದಯ ಕುಮಾರ್‌ ಶೆಟ್ಟಿ, ಪ್ರಮೋದ್‌ ಮಧ್ವರಾಜ್‌, ಅಭಯಚಂದ್ರ ಜೈನ್‌, ವಕೀಲರಾದ ಎಂ.ಕೆ.ವಿಜಯ ಕುಮಾರ್‌, ಡಾ.ಜಿ.ರಾಮಕೃಷ್ಣ ಆಚಾರ್‌, ಡಾ.ಎಂ.ಎಸ್.ರಾವ್‌ ಮುದ್ರಾಡಿ, ಡಾ.ಜಯರಾಮ ಹೆಗ್ಡೆ ಪಡುಕುಡೂರು, ಪಡುಕುಡೂರಿನ ಗಣ್ಯರು, ಜನಪ್ರತಿನಿಧಿಗಳು, ಅಧಿಕಾರಿಗಳು, ಊರ ಪರವೂ ಗಣ್ಯರು ಸಂಭ್ರಮಕ್ಕೆ ಸಾಕ್ಷಿಯಾಗುವರು.
……….
ಪಡುಕುಡೂರಿನ ಕೀರ್ತಿಯನ್ನು ಬೆಳಗಿಸಿದ ಸ್ವಾತಂತ್ರ್ಯ ಹೋರಾಟಗಾರ ಪಡುಕುಡೂರು ಬೀಡು ಎಂ.ಡಿ.ಅಧಿಕಾರಿ
ಪಡುಕುಡೂರು : ನಮ್ಮ ದೇಶದಲ್ಲಿ ನಡೆದ ಸ್ವಾತಂತ್ರ್ಯ ಹೋರಾಟದ ಕಿಚ್ಚು ಹೆಚ್ಚಿದ್ದ ಸಂದರ್ಭ ನಮ್ಮ ಕರಾವಳಿ ಕರ್ನಾಟಕವೂ ಮುಂಚೂಣಿಯ ಜವಾಬ್ಧಾರಿಯನ್ನೇ ವಹಿಸಿತ್ತು. ಆಗ ಕರಾವಳಿಯ ಹೋರಾಟದ ನಿರ್ಣಾಯಕ ಹೊಣೆಯನ್ನು ಹೊತ್ತದ್ದು ಯಾವೂದೇ ಫಲಾಪೇಕ್ಷೆ ಇಲ್ಲದ ಅವಿಭಜಿತ ಕಾರ್ಕಳ ತಾಲ್ಲೂಕಿನ ಪಡುಕುಡೂರುಬೀಡು ಧರ್ಮರಾಜ ಅಧಿಕಾರಿ ( ಎಂ.ಡಿ.ಅಧಿಕಾರಿ ). ಮಹಾನ್‌ ರಾಷ್ಟ್ರ್ರಪ್ರೇಮಿಯಾಗಿ ದೇಶಕ್ಕಾಗಿ ಸ್ವಾತಂತ್ರ್ಯ ಹೋರಾಟವನ್ನು ಮುನ್ನಡೆಸಿದರು. ೧೯೪೨ರ ಕ್ವಿಟ್‌ ಇಂಡಿಯಾ ಚಳುವಳಿ ನಡೆಯುತ್ತಿದ್ದರೆ. ಇತ್ತ ಇಡೀ ದೇಶದಲ್ಲಿ ಮಹಾತ್ಮ ಗಾಂಧೀಜಿ ಅವರ ಕರೆಯಂತೆ ಪ್ರತಿಭಟನಾ ಸಭೆಗಳು ನಡೆಯುತ್ತಿದ್ದವು. ಮಂಗಳೂರಿನ ಕೇಂದ್ರ ಮೈದಾನದಲ್ಲಿ ೧೦ ಸಾವಿರಕ್ಕೂ ಹೆಚ್ಚು ಕಾಂಗ್ರೆಸ್‌ ಕಾರ್ಯಕರ್ತರು ಸೇರಿದ್ದರು. ಮುಗಿಲು ಮುಟ್ಟುವ ವಂದೇ ಮಾತರಂ ಮೊಳಗುತ್ತಿತ್ತು. ಬಿಸಿರಕ್ತದ ೨೭ರ ತರುಣ ದೇಶಕ್ಕಾಗಿ ಆವೇಶದಿಂದ ಭಾಷಣ ಮಾಡುತ್ತಿದ್ದರು. ಅಷ್ಟೊತ್ತರಲ್ಲಿ ಪೊಲೀಸರು ಲಾಟಿ ಬೀಸಿ ಮೈದಾನಕ್ಕೆ ನುಗ್ಗಿದರು. ಆ ಕ್ಷಣದಲ್ಲಿ ಹಲವರು ಕಾಲ್ಕಿತ್ತರೆ, ಹಲವರು ಎದೆಯೊಡ್ಡಿ ನಿಂತರು. ಆದರೇ ತರುಣ ಮಾತ್ರ ತನ್ನ ಅಬ್ಬರದ ಮಾತು ಮುಂದುವರಿಸಿದ್ದ.. ವೇದಿಕೆ ಏರಿದ ಪೊಲೀಸರು ಆ ತರುಣನ ಮೇಲೆ ಲಾಠಿ ಬೀಸಿದರು. ರಕ್ತ ಚಿಮ್ಮಿತು. ಕೆಳಗೆ ಬಿದ್ದರೂ ತರುಣನ ಬಾಯಲ್ಲಿ “ವಂದೇ ಮಾತರಂ” ಘೋಷಣೆ ಕೂಗಿದರು. ಪೊಲೀಸರ ಬಲವಾದ ಹೊಡೆತದಿಂದ ಪ್ರಜ್ಞೆ ತಪ್ಪಿದ್ದರು. ಕೆಲವು ಹೊತ್ತುಕೊಂಡು ಹೋಗಿ ಆಸ್ಪತ್ರೆ ಸೇರಿಸಿದರು. ಹಲವು ಗಂಟೆಗಳ ಬಳಿಕ ಪ್ರಜ್ಞೆ ಮರಳಿತು, ಅಲ್ಲೇ ಕಾಯುತ್ತಿದ್ದ ಪೊಲೀಸರು ಆ ತರುಣನನ್ನು ಎಳೆದುಕೊಂಡು ಹೋಗಿ ಸೆರೆಮನೆಗೆ ಹಾಕಿದರು. ಆ ತರುಣನೇ ಪಡುಕುಡೂರಿನ ಕೀರ್ತಿಯನ್ನು ವಿಶ್ವಕ್ಕೆ ಪಸರಿಸಿದ ಪಡುಕುಡೂರುಬೀಡು ಎಂ.ಡಿ.ಅಧಿಕಾರಿ.
ಅವರು ಕಾರ್ಕಳ ತಾಲ್ಲೂಕಿನ ಇತಿಹಾಸ ಪ್ರಸಿದ್ಧ ಊರು ಪುಣ್ಯಭೂಮಿ ವರಂಗದ ಜೈನ ಕೃಷಿ ಕುಟುಂಬದ ಸುಪುತ್ರ. ಅವರ ಹಿರಿಯರು ವರಂಗದ ಬಸದಿಯನ್ನು ಅಭಿವೃದ್ಧಿ ಪಡಿಸಿ ಧರ್ಮ ಕಾರ್ಯ ಮಾಡಿದವರು. ಈ ಯುವಕನಿಗೆ ಬಾಲ್ಯದಿಂದಲೂ ರಾಷ್ಟ್ರ ಚಿಂತನೆಯ ಜೊತೆಗೆ ಗಾಂಧೀಜಿಯವರ ಪ್ರಭಾವ ಅತೀಯಾಗಿ ಬೀರಿತ್ತು.
ಪ್ರಚಾರಕ್ಕೆ ಧುಮುಕಿದ ಎಂ.ಡಿ.ಅಧಿಕಾರಿ : ಬ್ರಿಟಿಷರ ಆಡಳಿತದಲ್ಲಿ ೧೯೩೭ರಲ್ಲಿ ಪ್ರಾಂತೀಯ ಅಸ್ಲೆಂಬಿ ಚುನಾವಣೆ ನಡೆಯಿತು. ಆಗ ಯುವಕ ಎಂ.ಡಿ.ಅಧಿಕಾರಿ ಕಾಂಗ್ರೆಸ್‌ ಕಾರ್ಯಕರ್ತನಾಗಿ ಪ್ರಚಾರಕ್ಕೆ ಧುಮುಕಿದರು. ೧೯೩೮ರಲ್ಲಿ ಕಾರ್ಕಳ ಕ್ಷೇತ್ರದ ಕಾಂಗ್ರೆಸ್‌ ಅಧ್ಯಕ್ಷರಾದರು. ೧೯೪೦ರಲ್ಲಿ ಅವಿಭಜಿತ ಮಂಗಳೂರು ಜಿಲ್ಲಾ ಕಾಂಗ್ರೆಸ್‌ ಉಪಾಧ್ಯಕ್ಷರ ಸ್ಥಾನಕ್ಕೆ ಏರಿದರು. ೧೯೪೨ರಲ್ಲಿ ಅಂದಿನ ಮಂಗಳೂರು ಜಿಲ್ಲಾ ಕಾಂಗ್ರೆಸ್‌ ಅಧ್ಯಕ್ಷರಾಗಿದ್ದ ಶ್ರೀನಿವಾಸ ಮಲ್ಯರು ಸೆರೆಮನೆಗೆ ಹೋದಾಗ ಪಡುಕುಡೂರುಬೀಡು ಧರ್ಮರಾಜ ಅಧಿಕಾರಿ ಮಂಗಳುರು ಜಿಲ್ಲಾ ಕಾಂಗ್ರೆಸ್‌ ಅಧ್ಯಕ್ಷ ಸ್ಥಾನವನ್ನು ಸ್ವೀಕರಿಸಿದರು. ಹಳ್ಳಿಹಳ್ಳಿಯಲ್ಲಿ ಸಂಘಟನೆಯನ್ನು ಮಾಡುತ್ತ ಹೋರಾಟಕ್ಕಿಳಿದರು. ದೇಶವನ್ನು ಪ್ರೇಮವನ್ನು ಹೆಚ್ಚಿಸುವ ಪ್ರಖರ ಭಾಷಣ ಮಾಡಿ ಮಂಗಳೂರಿನ ಕ್ವಿಟ್‌ ಇಂಡಿಯಾ ಚಳುವಳಿಯ ಹೊಣೆಯನ್ನು ವಹಿಸಿದರು. ಬಳ್ಳಾರಿಯ ಸೆರೆಯಲ್ಲಿ ಎಂ.ಡಿ.ಅಧಿಕಾರಿ ಅವರನ್ನು ಬಂಧಸಿಡಲಾಯಿತು. ೬ ತಿಂಗಳು,೮ ತಿಂಗಳು, ೧ ವರ್ಷ ಹೀಗೆ ೩ ಸಲ ಜೈಲು ವಾಸ ಅನುಭವಿಸಿದರು. ೧ ವರ್ಷದಲ್ಲಿ ಕಠಿಣವಾದ ಜೈಲು ವಾಸ ಅನುಭವಿಸಿದರು.
ಜೈಲಿನಲ್ಲಿಯೂ ಗ್ರಂಥವನ್ನು ಓದಲು ಆರಂಭಿಸಿದರು. ಶ್ರೀನಿವಾಸ ಮಲ್ಯ, ಕೆ.ಕೆ.ಶೆಟ್ಟಿ, ಹೆಚ್.ಕೆ.ತಿಂಗಳಾಯ ಮುಂತಾದವರು ಒಡನಾಟ ಸ್ವಾತಂತ್ರ್ಯದ ಹೋರಾಟದ ಕಿಚ್ಚನ್ನು ಮತ್ತೇ ಹೆಚ್ಚಿಸಿತು.
ಸಾಥ್‌ ನೀಡಿದ ಧರ್ಮಪತ್ನಿ ಕಮಲಾವತಿ ಅಧಿಕಾರಿ : ಗಂಡ ಧರ್ಮರಾಜ ಅಧಿಕಾರಿ ಅವರ ಹೋರಾಟಕ್ಕೆ ಧರ್ಮಪತ್ನಿ ಕಮಲಾವತಿ ಅಧಿಕಾರಿ ಕೂಡ ಸಾಥ್‌ ನೀಡಿದರು. ಕೃಷಿಯ ಹೊಣೆಯನ್ನು ಹೊತ್ತು ಮುನ್ನಡೆಸಿದರು. ಗಂಡನ ಹೋರಾಟದ ಖರ್ಚಿಗಾಗಿ ತಾಳಿಯನ್ನೇ ಅಡವಿಟ್ಟರು. ಆದರೂ ಒಕ್ಕಲಿನವರು, ನಂಬಿದವರನ್ನು ಚೆನ್ನಾಗಿ ನೊಡಿಕೊಂಡರು. ತನ್ನ ಗಂಡನಿಂದ ಪ್ರೇರಣೆಗೊಂಡು ಕಮಮಾವತಿ ಅಧಿಕಾರಿಯವರು ಕೂಡ ಸ್ವಾತಂತ್ರ್ಯ ಹೋರಾಟಕ್ಕೆ ಧುಮುಕಿದರು. ದಂಪತಿಗಳಿಬ್ಬರೂ ಜೈಲು ವಾಸ ಅನುಭವಿಸಿದರು. ಸ್ವಾತಂತ್ರ್ಯ ದೊರೆತಾಗ ಹೆಮ್ಮೆಯಿಂದ ಸಂಭ್ರಮಿಸಿದರು. ಯಾವೂದೇ ಹುದ್ದೆ ಅಧಿಕಾರವನ್ನು ಕೇಳಿಕೊಂಡು ಹೋಗಲಿಲ್ಲ. ಮನಸ್ಸು ಮಾಡಿದ್ದರೇ ಯಾವ ಹುದ್ದೆ ಅಧಿಕಾರವನ್ನು ತಲುಪುವ ಅವಕಾಶಗಳಿತ್ತು. ಕೃಷಿಕರಾಗಿ ಉಳಿದುಬಿಟ್ಟರು. ಧರ್ಮರಾಜ ಅಧಿಕಾರಿ ಮತ್ತು ಕಮಲಾವತಿ ಅಧಿಕಾರಿಯವರು ಸ್ವಾತಂತ್ರ್ಯ ಹೋರಾಟ ಮಾಡಿ ಜನಮಾನಸದಲ್ಲಿ ಶಾಶ್ವತವಾಗಿ ನೆಲೆಯಾದರು. ಮುದ್ರಾಡಿ ಬೀಡು ಮತ್ತು ಪಡುಕುಡೂರು ಬೀಡಿನ ಹೆಸರನ್ನು ಎತ್ತರಕ್ಕೆ ಏರಿಸಿದರು. ಕರಾವಳಿ ಕರ್ನಾಟಕದ ಸ್ವಾತಂತ್ರ್ಯ ಹೋರಾಟದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಮಂಗಳೂರಿನಲ್ಲಿ ಮಹಾತ್ಮ ಗಾಂಧೀಜಿ ಮತ್ತು ಕಸ್ತೂರ್ಬಾ ಹೆಸರಿನಲ್ಲಿ ನಿಧಿಯನ್ನು ಸ್ಥಾಪಿಸಿದರು. ಭಾರತ ಸರ್ಕಾರ ನೀಡುವ ಸ್ವಾತಂತ್ರ್ಯ ಹೋರಾಟಗಾರರಿಗೆ ನೀಡುವ ಮಾಶಾಸನ ನಿರಾಕರಿಸಿದರು. ಧರ್ಮಪತ್ನಿಗೂ ಮಾಶಾಸನ ಪಡೆಯದಂತೆ ಅಪ್ಪಣೆ ಕೊಟ್ಟರು. ದಂಪತಿಗಳಿಬ್ಬರೂ ಕೊನೆಯ ಕ್ಷಣದ ವರೆಗೂ ದೇಶಕ್ಕಾಗಿ ಬದುಕಿ ಅಜರಾಮರರಾದರು. ಭೂಮಸುಧೆಯ ಕಾನೂನು ಜಾರಿಗೆ ಬಂದಾಗಲೂ ಧನಿ ಒಕ್ಕಲು ಸಂಬಂಧವನ್ನು ಚೆನ್ನಾಗಿ ನೋಡಿಕೊಂಡು ಸರ್ವರ ಪ್ರೀತಿಗೆ ಪಾತ್ರರಾದರು. ಸಹಕಾರಿ ಕ್ಷೇತ್ರಕ್ಕೆ ಪಾದಾರ್ಪಣೆ ಮಾಡಿ ವರಂಗ ವ್ಯವಸಾಯಿಕ ಸೇವಾ ಸಹಕಾರಿ ಸಂಘದ ಸ್ಥಾಪಕಾಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದರು. ಈಗ ಸಹಕಾರಿ ಕ್ಷೇತ್ರದ ಪ್ರತಿಷ್ಠಿತ ಸಂಸ್ಥೆಯಾಗಿ ಬೆಳೆದಿದೆ. ನಿಸ್ವಾರ್ಥವಾಗಿ ಸ್ವಾತಂತ್ರ್ಯ ಹೋರಾಟ, ಜನಸೇವೆ ದೇಶ ಸೇವೆ ಮಾಡಿದ ಆದರ್ಶ ದಂಪತಿಗಳು ನಿತ್ಯ ಸ್ಮರಣಿಯರು…
………..
ಖ್ಯಾತ ಶಿಲ್ಪಿ ಅರುಣ್‌ ಯೋಗಿರಾಜ್‌ ರಿಂದ ಎಂ.ಡಿ.ಅಧಿಕಾರಿ ಪುತ್ಥಳಿ ಕೆತ್ತನೆ. :
ಅಯೋಧ್ಯೆಯಲ್ಲಿ ಶ್ರೀಬಾಲರಾಮ ಮೂರ್ತಿಯನ್ನು ಕೆತ್ತಿ ವಿಶ್ವವಿಖ್ಯಾತರಾದ ಶಿಲ್ಪಿ ಮೈಸೂರಿನ ಅರುಣ್‌ ಯೋಗಿರಾಜ್‌ ಅವರು ಪಡುಕುಡೂರಿನ ಕೀರ್ತಿಯನ್ನು ಬೆಳಗಿಸಿದ
ಸ್ವಾತಂತ್ರ್ಯ ಹೋರಾಟಗಾರ ಪಡುಕುಡೂರು ಬೀಡು ಎಂ.ಡಿ.ಅಧಿಕಾರಿ ಅವರ ಪುತ್ಥಳಿ ಕೆತ್ತಿದ್ದಾರೆ ಎಂಬುದು ಮತ್ತೊಂದು ಹೆಮ್ಮೆ.
……….
ಎಂ.ಡಿ.ಅಧಿಕಾರಿ ಅವರ ಹೆಸರು ಶಾಶ್ವತವಾಗಬೇಕು.
ಮಾಡುವ ಅತ್ಯುತ್ತಮ ಸೇವೆ ಕಾರ್ಯವನ್ನು ತಾನೊಬ್ಬನೇ ಮಾಡಬಾರದು ಊರಿನವರು, ಹತ್ತು ಸಮಸ್ಥರು, ಪ್ರಮುಖರು ಗಣ್ಯರು ಸೇರಿ ಮಾಡಬೇಕು ಎಂಬುದು ನನ್ನ ಆಶಯ. ಅದರಂತೆ ನಡೆಯುತ್ತಿದ್ದೇವೆ. ಸಿದ್ಧತೆಗಳು ಭರದಿಂದ ನಡೆಯುತ್ತಿದೆ. ಪುತ್ಥಳಿ ಪ್ರತಿಷ್ಠೆಯ ಐತಿಹಾಸಿಕ ಸಂಭ್ರಮವಾಗಲಿದೆ. ನಮ್ಮೂರು ಪಡುಕುಡೂರು ಮತ್ತು ಎಂ.ಡಿ.ಅಧಿಕಾರಿ ಅವರ ಹೆಸರನ್ನು ಮುಂದಿನ ತಲೆಮಾರಿಗೂ ಪರಿಚಯಿಸಿ ಶಾಶ್ವತವಾಗಿಸುವುದು ನಮ್ಮ ಉದ್ದೇಶ. ನಮ್ಮ ಕನಸುಗಳನ್ನು ಸಾಕಾರ ಗೊಳಿಸಲು ಶ್ರಮಿಸುತ್ತಿರುವ ಸರ್ವರಿಗೂ ಕೃತಜ್ಷತೆಗಳು.
– ಪಡುಪರ್ಕಳ ಶಂಕರ ಶೆಟ್ಟಿ. ಪುತ್ಥಳಿ ಸ್ಥಾಪನೆಯ ರೂವಾರಿ.
………
ಕನಸು ನನಸಿನ ಹೆಮ್ಮೆ…..
ನಮ್ಮೂರಿಗೆ ಕೀರ್ತಿ ತಂದ ಪಡುಕುಡೂರುಬೀಡು ಎಂ.ಡಿ.ಅಧಿಕಾರಿ ಅವರ ಪುತ್ಥಳಿ ಪ್ರತಿಷ್ಠಾಪನೆಯನ್ನು ಸಾರ್ವಜನಿಕ ಸ್ಥಳದಲ್ಲಿ ಮಾಡಿ ಮುಂದಿನ ತಲೆಮಾರಿಗೆ ಪರಿಚಯಿಸಬೇಕೆನ್ನುವ ಕನಸನ್ನು ನಮ್ಮ ಮಾವನವರಾದ ಪಡುಪರ್ಕಳ ಶಂಕರ ಶೆಟ್ಟಿಯವರು ಕಂಡಿದ್ದರು. ಅದೀಗ ನನಸಾಗುತ್ತಿರುವುದು ಅತ್ಯಂತ ಹೆಮ್ಮೆ ತಂದಿದೆ. ಮಾದರಿಯಾದ ಈ ಶಾಶ್ವತ ಮಹಾನ್‌ ಕಾರ್ಯಕ್ಕೆ ಸಣ್ಣ ಸಮಸ್ಯೆಗಳು ಎದುರಾದರೂ ನಮ್ಮ ಕಾರ್ಯ ನೆರವೇರಲೇಬೇಕು ಎಂದು ದಿಟ್ಟ ನಿಲುವು ತಳೆದು ಮುನ್ನಡೆದಾಗ ಶ್ರಮಕ್ಕೆ ಫಲ ದೊರೆತಿದೆ. ಯಶಸ್ಸಿನ ಹಿಂದೆ ಹಲವಾರು ಮಂದಿ ಹಲವು ದಿನಗಳಿಂದ ಶ್ರಮಿಸುತ್ತಿದ್ದಾರೆ. ಸಮಾಜಸೇವಕರು, ಅಧಿಕಾರಿಗಳು, ಸಮರ್ಪಣಾ ಭಾವದ ಯುವಕರ ತಂಡ, ಊರಿನವರು, ಪ್ರಮುಖರು, ಗಣ್ಯರು, ದಾನಿಗಳು, ಜನಪ್ರತಿನಿಧಿಗಳು, ವಿವಿಧ ಸಂಘಸಂಸ್ಥೆಗಳು, ಮಹಿಳಾ ಸಂಘಟನೆಗಳು, ಸ್ವಯಂಸೇವಾ ಸಂಸ್ಥೆಗಳು, ಪಡುಕುಡೂರಿನ ವಿವಿಧ ಮಹಿಳಾ ಸದಸ್ಯರು ಸೇರಿ ಸರ್ವರೂ ಕೈ ಜೋಡಿಸಿದ್ದರಿಂದ ನಮ್ಮೇಲ್ಲರ ಕನಸು ನನಸಾಗುತ್ತಿದೆ. ಸರ್ವರಿಗೂ ಮನದಾಳದ ನಮನಗಳು.
– ಪಡುಪರ್ಕಳ ಹರೀಶ ಶೆಟ್ಟಿ.
ಪ್ರಧಾನ ಕಾರ್ಯದರ್ಶಿ. ಪುತ್ಥಳಿ ಪ್ರತಿಷ್ಠಾಪನಾ ಸಮಿತಿ.
…………
ಮಹಾನ್‌ ಕಾರ್ಯದಲ್ಲಿ ಸೇವೆ ಸಲ್ಲಿಸುವುದು ಭಾಗ್ಯ.
ಸ್ವಾತಂತ್ರ್ಯ ಸೇನಾನಿ ಪಡುಕುಡೂರುಬೀಡು ಎಂ.ಡಿ.ಅಧಿಕಾರಿ ಅವರ ಪುತ್ಥಳಿ ಪ್ರತಿಷ್ಠಾಪನೆಯ ರೂವಾರಿ ಪಡುಪರ್ಕಳ ಶಂಕರ ಶೆಟ್ಟಿ ಅವರು. ಯೋಜನೆ ಯೋಚನೆ ಎಲ್ಲವೂ ಅವರದ್ದೇ. ಇಂತಹ ಮಹಾನ್‌ ಕಾರ್ಯದಲ್ಲಿ ಪುತ್ಥಳಿ ಪ್ರತಿಷ್ಠಾಪನಾ ಸಮಿತಿಯ ಅಧ್ಯಕ್ಷತೆ ಹೊಣೆಯನ್ನು ಕೊಟ್ಟು ಸೇವೆ ಮಾಡಲು ಅವಕಾಶ ನೀಡಿರುವುದಕ್ಕೆ ನಾನು ಸರ್ವರಿಗೂ ವಂದಿಸುವೆ. ಇದು ನನ್ನ ಜೀವನದ ಸೌಭಾಗ್ಯ. ಪಡುಕುಡೂರಿನಲ್ಲಿ ಈ ಕಾರ್ಯ ಐತಿಹಾಸಿಕ ಸಂಭ್ರಮವಾಗಲಿದೆ.
– ಜಗದೀಶ ಹೆಗ್ಡೆ. ಪಟೇಲರ ಮನೆ.
ಅಧ್ಯಕ್ಷರು. ಪುತ್ಥಳಿ ಪ್ರತಿಷ್ಠಾಪನಾ ಸಮಿತಿ.
…………
ಭಾರತದ ಸ್ವಾತಂತ್ರ್ಯ ಹೋರಾಟದಲ್ಲಿ ನಮ್ಮೂರು ಇತ್ತು ಎಂಬುದೇ ಹೆಮ್ಮೆ.
ಭಾರತದ ಸ್ವಾತಂತ್ರ್ಯ ಸಂಗ್ರಾಮದಲ್ಲಿ ಪಡುಕುಡೂರು ಎಂಬ ನಮ್ಮ ಪುಟ್ಟು ಊರು ಇತ್ತು ಎನ್ನುವುದೇ ನಮಗೆ ಅತ್ಯಂತ ಹೆಮ್ಮೆ. ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ ಮಹಾನ್‌ ಚೇತನ ಪಡುಕುಡೂರುಬೀಡು ಎಂ.ಡಿ.ಅಧಿಕಾರಿ ಅವರ ಪುತ್ಥಳಿ ಪ್ರತಿಷ್ಠಾಪಿಸುವ ಮೂಲಕ ಮುಂದಿನ ಮುಂದಿನ ಸಾವಿರಾರು ವರ್ಷಗಳ ಕಾಲ ನೆನಪಿಸು ಮಾಹಾನ್‌ ಕಾರ್ಯವನ್ನು ಪುತ್ಥಳಿ ಪ್ರತಿಷ್ಠಾಪನೆಯ ರೂವಾರಿ ಪಡುಪರ್ಕಳ ಶಂಕರ ಶೆಟ್ಟಿ ಅವರ ನೇತ್ರತ್ವದಲ್ಲಿ ಸರ್ವರೂ ಸೇರಿ ಮಾಡುತ್ತಿರುವುದು ಅದ್ಬುತ. ನಮಗೆಲ್ಲ ಅತೀವ ಸಂತಸ.
– ಮಾತಿಬೆಟ್ಟು ಪ್ರಕಾಶ ಪೂಜಾರಿ. ಶಿಕ್ಷಕರು. ಹೆಬ್ರಿ ಸರ್ಕಾರಿ ಪದವಿ ಪೂರ್ವ ಕಾಲೇಜು.
