ಕಾರ್ಕಳ ಅತ್ತೂರು ಬಸಿಲಿಕಾದಲ್ಲಿ ಸಂತ ಲಾರೆನ್ಸ್ ವಾರ್ಷಿಕ ಮಹೋತ್ಸವಕ್ಕೆ ಭವ್ಯ ಚಾಲನೆ: ನೆರದ ಭಕ್ತ ಸಮೂಹ
ಕಾರ್ಕಳ: ಕಾರ್ಕಳ ತಾಲೂಕಿನ ಅತ್ತೂರಿನಲ್ಲಿರುವ ರಕ್ತಸಾಕ್ಷಿ ಸಂತ ಲಾರೆನ್ಸ್ ಅವರಿಗೆ ಸಮರ್ಪಿತ ಬಸಿಲಿಕಾದಲ್ಲಿ ವಾರ್ಷಿಕ ಮಹೋತ್ಸವವು ಭಕ್ತಿಭಾವ ಹಾಗೂ ಅದ್ದೂರಿತನದಿಂದ ಭಾನುವಾರ ಆರಂಭಗೊಂಡಿತು.
ಮಹೋತ್ಸವದ ಅಂಗವಾಗಿ ಸಂತ ಲಾರೆನ್ಸ್ ಅವರ ಅದ್ಭುತ ಕೃಪೆ ನೀಡುವ ಪ್ರತಿಮೆಯನ್ನು ಮೂಲ ಸ್ಥಾನದಿಂದ ಪೂಜಾ ಸ್ಥಳಕ್ಕೆ ಭವ್ಯ ಮೆರವಣಿಗೆಯ ಮೂಲಕ ಕರೆದೊಯ್ಯಲಾಯಿತು. ಬಸಿಲಿಕಾದ ರೆಕ್ಟರ್ ಅತಿ ವಂ. ಅಲ್ಬನ್ ಡಿ’ಸೋಜಾ ಅವರು ಮೆರವಣಿಗೆಯಲ್ಲಿ ಪ್ರಾರ್ಥನೆಗಳನ್ನು ಮುನ್ನಡೆಸಿದರು.
ಮಹೋತ್ಸವದ ಮೊದಲ ದಿನದ ಬೆಳಿಗ್ಗೆ 7.30ಕ್ಕೆ ನಡೆದ ಬಲಿಪೂಜೆಯನ್ನು ಬಸಿಲಿಕಾದ ಸಹಾಯಕ ಧರ್ಮಗುರು ವಂ. ಸ್ವಾ. ರಾಬಿನ್ ಸಾಂತುಮಾಯೆರ್ ನೆರವೇರಿಸಿದರು. ನಂತರ ಉಡುಪಿ ಧರ್ಮಕ್ಷೇತ್ರದ ಧರ್ಮಾಧ್ಯಕ್ಷ ಪರಮಪೂಜ್ಯ ಜೆರಾಲ್ಡ್ ಐಸಾಕ್ ಲೋಬೋ ಅವರು ಧ್ವಜಾರೋಹಣ ನೆರವೇರಿಸಿದರು. ಬಸಿಲಿಕಾದ ಪಾಲನಾ ಸಮಿತಿಯ ಉಪಾಧ್ಯಕ್ಷ ಸಂತೋಷ್ ಡಿಸಿಲ್ವ ಸ್ವಾಗತಿಸಿ, ಕಾರ್ಯದರ್ಶಿ ರೊನಾಲ್ಡ್ ನೊರೊನ್ನಾ ಧನ್ಯವಾದ ಅರ್ಪಿಸಿದರು. ನಿಯೋಜಿತ ಉಪಾಧ್ಯಕ್ಷ ವಂದಿಶ್ ಮಥಿಯಾಸ್ ಹಾಗೂ ಕಾರ್ಯದರ್ಶಿ ಮೆಲ್ವಿನ್ ಕ್ಯಾಸ್ಟೆಲಿನೋ ಉಪಸ್ಥಿತರಿದ್ದರು.
ಧ್ವಜಾರೋಹಣದ ಬಳಿಕ ಪರಮಪೂಜ್ಯ ಜೆರಾಲ್ಡ್ ಐಸಾಕ್ ಲೋಬೋ ಅವರು ದಿವ್ಯ ಜ್ಯೋತಿ (ದೈವಾರಾಧನ ಆಯೋಗ) ಪ್ರಕಟಿಸಿದ ನೂತನ ಪುಸ್ತಕವನ್ನು ಬಿಡುಗಡೆ ಮಾಡಿದರು. ದಿನನಿತ್ಯದ ಪ್ರಾರ್ಥನೆಗಳನ್ನು ಮೂರು ಲಿಪಿಗಳಲ್ಲಿ ಒಳಗೊಂಡಿರುವ ಈ ಪುಸ್ತಕ ಭಕ್ತರಿಗೆ ಉಪಯುಕ್ತವಾಗಿದೆ. ಅಲ್ಲದೇ “ಉತ್ತಮ ಸಮಾರಿಯಾಗಾರ” ಉಪಮೆಯನ್ನು ಆಧರಿಸಿದ ಧಾರಾವಾಹಿ ದೃಶ್ಯಚಿತ್ರಣವನ್ನು ಸಂಕೇತಾತ್ಮಕವಾಗಿ ಬಿಡುಗಡೆ ಮಾಡಲಾಯಿತು. ಈ ದೃಶ್ಯಚಿತ್ರಣವನ್ನು ಕಾರ್ಕಳ ಧರ್ಮಕೇಂದ್ರದ ಧರ್ಮಗುರು ವಂ. ಕ್ಲಿಮೆಂಟ್ ಮಸ್ಕರೇನ್ಹಾಸ್ ಅವರು ಸಿದ್ಧಪಡಿಸಿದ್ದಾರೆ.
ಧರ್ಮಾಧ್ಯಕ್ಷರು ಅನೇಕ ಧರ್ಮಗುರುಗಳೊಂದಿಗೆ ಸಂಯುಕ್ತವಾಗಿ ಮಹೋತ್ಸವದ ಭವ್ಯ ಬಲಿಪೂಜೆಯನ್ನು ಆಚರಿಸಿದರು. ತಮ್ಮ ಉಪದೇಶದಲ್ಲಿ ಅವರು ಪವಿತ್ರ ಗ್ರಂಥ ವಾಚನದ ಮಹತ್ವವನ್ನು ಹಾಗೂ ದೇವರ ವಾಕ್ಯದ ಬೆಳಕಿನಲ್ಲಿ ಜೀವನವನ್ನು ಮರುಪರಿಶೀಲಿಸುವ ಅಗತ್ಯವನ್ನು ಒತ್ತಿಹೇಳಿದರು. ಈ ದಿನವನ್ನು “ದೇವರ ವಾಕ್ಯದ ಭಾನುವಾರ”ವಾಗಿ ಆಚರಿಸಲಾಯಿತು.
ಸಂಜೆಯ ಸಂಯುಕ್ತ ಬಲಿಪೂಜೆಯನ್ನು ಮಂಗಳೂರು ಧರ್ಮಕ್ಷೇತ್ರದ ನಿವೃತ್ತ ಧರ್ಮಾಧ್ಯಕ್ಷ ಪರಮಪೂಜ್ಯ ಅಲೋಶಿಯಸ್ ಪೌಲ್ ಡಿಸೋಜಾ ಅವರು ನೆರವೇರಿಸಿದರು. ಸಾವಿರಾರು ಭಕ್ತರು ತಮ್ಮ ಪ್ರಿಯ ಸಂತನ ಆಶೀರ್ವಾದ ಪಡೆಯಲು ಬಸಿಲಿಕಾಕ್ಕೆ ಭೇಟಿ ನೀಡಿದರು.
ಮಹೋತ್ಸವದ ಅಂಗವಾಗಿ ವಂ. ರಾಜೇಶ್ ರೊಸಾರಿಯೊ (ಜೆಪ್ಪು ಗುರುಮಠದ ರೆಕ್ಟರ್), ವಂ. ಡ್ಯಾನ್ಸಿ ಮಾರ್ಟಿಸ್ (ಕಪ್ಪುಚಿನ್ ಸಭೆ), ವಂ. ಫ್ರಾಂಕ್ಲಿನ್ ಡಿ’ಸೋಜಾ (ಶಿವಮೊಗ್ಗ ಧರ್ಮಕ್ಷೇತ್ರ), ವಂ. ಚೆತನ್ ಲೋಬೋ (ಆಸಿಸಿ ಪ್ರೆಸ್ ನಿರ್ದೇಶಕ), ವಂ. ಸ್ಟೀಫನ್ ಡಿ’ಸೋಜಾ (ಉಡುಪಿ ಧರ್ಮಕ್ಷೇತ್ರದ ಕುಲಪತಿ) ಹಾಗೂ ವಂ. ಅಲ್ವಿನ್ ಸಿಕ್ಖೇರಾ (ಕಾಮೆಲ್ ಸಭೆ) ಅವರು ವಿವಿಧ ಬಲಿಪೂಜೆಗಳನ್ನು ನೆರವೇರಿಸಲಿದ್ದಾರೆ.
ಗಣರಾಜ್ಯೋತ್ಸವದ ಪ್ರಯುಕ್ತ ನಾಳೆ ಹೆಚ್ಚಿನ ಭಕ್ತರ ಭಾಗವಹಿಸುವಿಕೆ ನಿರೀಕ್ಷಿಸಲಾಗಿದೆ. ಮುಖ್ಯ ಮಹೋತ್ಸವ ಬಲಿಪೂಜೆಯನ್ನು ಸಂಜೆ 5.00 ಗಂಟೆಗೆ ಕನ್ನಡ ಭಾಷೆಯಲ್ಲಿ ಕಾರವಾರ ಧರ್ಮಕ್ಷೇತ್ರದ ಧರ್ಮಾಧ್ಯಕ್ಷ ಪರಮಪೂಜ್ಯ ಡ್ಯೂಮಿಂಗ್ ಡಯಾಸ್ ಅವರು ನೆರವೇರಿಸಲಿದ್ದಾರೆ.
